In aad aqoon
barato waa go’aanka ugu wanaagsan ee ay tahay in aad qaadato, haddii aad
qaadatayna aad ku saxsanayd qaadashadiisa. Waayo; in aad aqoon hesho waxa ay
kaa caawinaysaa dhawr arrimood, tan ugu horraysa waxa aad noqonaysaa qof
garaadkiisu korayo maalinba maalinta ka danbaysa, wacaal ahaanna wax badan
ogaanaya, bulshadiisana ku celin kara aqoonta uu bartay, kana saari kara
jahliga iyo aqoon darrada. Markale aqoontu waxa ay carisaa awoodahaha
kaydsan iyo tamarta dahsoon ee aanu wali adeegsan qofku. Qofkuna waxa uu
ogaadaa in uu leehayahay awood-maskaxeed marka la dhaqaajiyo hore-u-socod
keeni karta. Aqoonta aad baratay waxa ay kugu riixaysaa in aad ka dhaqaado
halka aad taagan tahay uguna gudubto meel ka wanaagsan meesha aad joogto.
Markale waa fursad aad ku heli karto shaqo kuu qalanta illaa aad noqotaba
hoggaanka ugu sarreeya ummadda aad la nooshahay. Darajooyin iyo horumarro
dhinacyo badan la xidhiidha ayaad ku kasban kartaa aqoonta. Waa marka aad dhugato,
weelayso isla markaana tijaabiso aqoonta aad heshay si aad u ogaato in
garaadkaagu koray iyo inkale.
In badan ayaynu
maqallaa “aqoontu waa furaha horumarka iyo badhaadhaha”. Waxa kale oo aynnu ka
warqabnaa in dunidu ku horumartay aqoonta casriga ah oo lala xidhiidhiyay
ilbaxnimadii hore ee soo jireenka ahayd. Bulshooyinka heerka gaadhayna
waxa ay koriyeen garaadkooda aqooneed, xirfadeed iyo wacaal ahaaneedba. Waxa
kale oo ay abuureen jiilal dhinaca xirfadaha ka dhisan oo wax badan hindisay.
heerka aqoonta iyo xirfadaha ummadi le’eg yahay ayaa horumarka ay gaadhaanna
le’ekaanayaa.
Aqoontu waxa ay
ka caawisaa qofka in uu ogaado ama ku baraarugo fursado badan oo aanu ogayn
markii hore. Waxa uu qofku ka helaa dhiirraanaan uu ku wajaho fursadahaas
kagana dhigo kuwo midha dhalla ugu yaraan. Barashada aqoon kaliya laguma nodo
qof himilooyinkiisa gaadha, balse aqoontu waxa ay ka mid tahay tiirarka ugu
muhiimsan ee kugu hoggaamin kara in ay kuu fududaato in aad shaqo hesho ama aad
shaqo abuurato. Dad badan oo aan waxba baran ayaa sameeyay horumar la taaban
karo. Kuwa kale oo aan ku wanaagsanayn aqoonta xilligii ay wax baranayeen ayaa
iyaguna haysta shaqooyin ka wanaagsan kuwa ay haystaan dad aqoonta heer
wanaagsan ka gaadhay.
Marka loo kuur
galo sababtana wax la odhan karaa waxa ay ogaadeen in sirtu tahay in aad ogaato
waxa aad ku fiican tahay, kaddibna aad si qoto dheer u daba gasho. Sida aqoon
yahan badani qabaan qofku waxa uu ka midho dhalin karaa waxa uu ku fiican yahay
ama uu xiisaynayo. Taasina waa xikmad kale oo u baahan in qofku marka horeba ku
baraarugsanaado.
Waagii Ingiriisku
innala joogay, ee aynnu maxmiyadda u ahayn, ninka dhawr wiil dhalay waxa uu
odhan jiray “wiilka hebel waxa aan barayaa far-hunguri si uu Karraani u noqdo,
oo uu ugu shaqeeyo xafiisyada dawladda Ingiriiska.” Halkaas ayay ka soo
unkantay aragtida ah “jaamacad gal si aad shaqo wanaagsan u hesho.” Sidaa iyo
si la mid ah ayay dadkeennu u aaminsanyihiin in waxbarashadu tahay wadada
kaliya ee shaqo lagu heli karo, haddii qofka wax bartay uu shaqo waayana
waligii waxa uu ahaanayaa shaqa-doon. Marka aragtidan lagu saleeyo waddamada
dunida koowaad waxa ay yeelanaysaa macno ka duwan marka lagu saleeyo waddamada
soo koraya. Dunida koowaad (waddamada hore-u-maray), waxa wax loo bartaa in
qofku wax soo kordhiyo (hal-abuur la yimaaddo), magac iyo mansab gaadho iyo in
uu shaqo wanaagsan helo. Laakiin innagu aqoonta aynnu baranno boqolkiiba
inta ugu badan waxa ay u badan tahay mid aynnu damacsannahay in aynnu maruun ku
shaqo tagno oo mushahar wanaagsan ku qaadanno. Ku-tala-galka ah in aad qalin
jabinta kaddib shaqo wanaaagsan uun hesho waxa ay kaa oodaysaa dhammaan
waddooyinka kale ee aad maskaxda uga shaqaysiin lahayd, fikir iyo hal-abuur
cusubna u dhiraandhirin lahayd.
Barashada
aqoonta ku dhisan aragtida aan adeegsiga lahayn (theoretical based
learning), waa tan ugu badan ee lagu dhigto jaamacadaha wadanka. Tayo ahaan iyo
horumar ahaanna waa ay ka hoosaysaa aqoonta xirfadda iyo adeegsiga (practice
based learning) ku salaysan oo ah tan maanta dunida koowaad ku horumartay.
Markasta oo barashada xirfaduhu bataan waa mar kasta oo bulshadu horumar
samayso. Bulshada xirfadlaydu ku badan tahay waxa mar walba ku yar shaqo
la’aanta. Bulshada shaqo la’aantu ku yartahayna waxa ku badan horumarka iyo
dhaqaalahooda si joogta ah u kobca shakhsi, qoys illaa qaran.
Aqoonyahanka
dunida saddexaad gaar ahaan da’ yarta waxa caqabadda ugu wayn ku ah shaqo
la’aan aan la qiyaasi karin. Sababtana waxa door muhiim ah ka qaadanaya aqoonta
ay qaadanayaan oo xirfadaha ama adeegsigu ku yaryahay. Si kale haddii loo dhigo waxa lagu harqiyaa maaddooyin aan baahidooda waxba ka tarayn. xirfaduhu waxa ay yareeyaan shaqo la’aanta oo ah caqabadda ugu badan ee haysata
dhallinta wax baratay. Tusaale ahaan; sanadka kasta waxa jaamacadaha dalka ka
baxa arday ka badan kumanaan iyo kumanaan ka qalin jabiya kulliyadaha kala
duwan ee waxbarashada sare. Aqoonyahankaa da’da yar ee sanad kasta ka soo
baxaya jaamacaduhu boqolkiiba inta ugu badan waxa ay wajahaan shaqo la’aan iyo
warwar mustaqbalka danbe ah. Aqoonta aan deegaamaysnayn ee jaamacaduhu bixiyaan
ayaa iyana door ku leh shaqo la’aanta baahsan ee dalka ka jirta.
Dalkeenna oo
curdin ah awgii ayaanay mudnay in aynnu baranno aqoon aan waaqiceenna la
jaan qaadayn. Jaamacadaha dalku waxa ay ahayd in ay bixiyaan aqoon deegaamaysan
oo ku dhisan baahida dalka. Waxa habboon in jaamacaduhu daraasad ka
sameeyaan baahida uu dalku u qabo aqoon xiffadaysan oo lagaga bixi koro faqriga
iyo shaqo la’aanta, wax soosaarkana kor loogu qaadi karo. Kaddibna
manhajkooda ku daraan xirfado iyo kulliyado lagu barto baahiyaha waddanka ka
jira si dadka qalin jabinayaa u noqdaan kuwa xirfadaha ay barteen shaqo ku
abuurta, baahiyahoodana u daboolaan.
Haddii ay kala
bataan shaqooyinka waddanka yaalla iyo dadka shaqo doonka ahi, waxa ay abuuri
kartaa jawi qalalaase iyo boob ah. Jiilka danbena waxa ay galin kartaa rajo
la’aan iyo majare habow aan laga soo waaqsan karin. Si haddaba looga hortago in
dhallintu la timaaddo ficillo aan wanaagsanayn, waxa muhiim ah in si wada jir ah
looga qayb qaato shaqo abuurkooda iyo in maskax dhis loo sameeyo, lana tuso in
iyagu wax soo kordhin karaan. Waa waajib saaran dawladda, ganacsatada iyo
maaligaliyeyaasha kaleba in ay door ka ciyaaraan shaqo abuurka da’yarta. Waayo
shaqo la’aantu waxa ay horseedi kartaa kharbudaad iyo dib u dhac bulsheed.
Haddaba su’aasha
in mar hore ba la is wayddiiyo ay tahay ayaa ah “aqoonta jaamacaddu ma tahay
waddada kaliya ee aad shaqo ku heli karto? Haddii se aad qalin jabinta ka dib
shaqo waydo ma sidaas ayay ku dhammaatay fursaddii aad shaqo ku heli lahayd?.
Si aynnu uga
jawaabno su’aasha kor ku xusan innaga oo ku salaynaya waaqici umaddeena iyo
dhallinta sanad walba ka qalin jabisa jaamacadaha, waxa aynnu u baahannahay in
aynnu ka jawaabno su’aal kale oo la xidhiidha ta hore. Waxa ay odhanaysaa
“aqoonta ay bixiyaan jaamacadaheennu ma tahay tii qof walba u diyaarin lahayd
shaqada uu ku habboon yahay?”. Boqolkiiba inta ugu badan jaamacadaheennu
waxa ay bixiyaan aqoon aragti ah iyo casharro hadal-tiro ah oo aan
adeegsi la taaban karo lahayn. Taasina waxa ay ka dhigtay in qofku qalin
jabiyo isaga aan xataa qaban karin shaqooyinka la xidhiidha kulliyadda uu ka
soo qalin jabiyay. Dhigashada Aqoonta sare ee jaamacadu kaama dhigi karto
qof shaqo hela ama waaya. Kaliya waxa ay kuu xidhaysaa muraayad kuu soo dhawaysaa fursadaha shaqo ee jira. Waxa ay kuu iftiiminaysaa albaabbo badan oo in aad furto u baahan, shaqo la'aantana kaga saarto naftaada iyo nafo kaleba.
Dhanka
kale, dhallinta jaamacadaha ka baxay ayaa iyaguna qayb ka noqon kara shaqo
la’aanta haysata. Waxa badan, oo aan tiro iyo caddad toona lahayn
qalinjabiyeyaal badan oo qalin jabiyay iyaga oo ka fara madhan aqoontii ay
muddada 3 ilaa 4-ta sano ah baranayeen. Iyada oo ay ugu wacan tahay laba
ammuurood:
1. Dayacaad dhinaca ardayga ka timaadda.
Dayacaddaasi waxa ay u badan tahay in aanu masuuliyadba iska saarin waxa uu
baranayo ama uu kaga mashquulo hawlo kale sida balwad. Mararka
qaar waxaaba dhacda in qofku yidhaa “warqadda shahaadada ah uun aan qaado.”
Aragtidaasi waxa ay sii kordhinaysaa fursadda shaqo la’aanta.
2. Doorashada kulliyadda ama qaybta uu
dhiganayo oo uu si qaldan u xusho: Waxa dhici karta in qofku sameeyo xulasho
qaldan marka uu bilaabayo jaamacadda isaga oo aan haba yaraatee ka fikirin
kulliyadda uu ku fiican yahay. Doorashada kulliyad aanad fahmi karin waxa
ay kugu dhalin kartaa in aad ka niyad jabto gabi ahaanba, waxbana
ka weelayn waydo aqoonta lagu qaadananayo qaybtaas. Maalinta aad
soo dhammaysana aanad wax badan ka korodhsan kulliyaddii aad wakhtiga ku
bixiyay. Taasina ay kuu horseeddo jahawareer iyo in aad ku dawakhdo shaqada aad ku
fiicantahay iyo halka doorkaagu ku beegan yahay.
Marka aad
jaamacad ka baxdo waxa aad ogaataa in adiga lagaa doonayo in aad shaqo abuurto.
Qorshe iyo fikir ganacsi la timaaddo. Waxa
jaamacad laguu geeyay in la dardar galiyo awoodahaaga qarsoon iyo in la
shidaaliyo hal-abuurkaaga. Ugu horraynba waa in aad aamintaa in adiga lagaa
dhigay kii wax abuuri lahaa, naftiisa u samayn lahaa fursad uu aqoontii uu
bartay ugu beddelo mid la arki karo .
Waxa lagaa sugayaa in aad jeexdo waddo cusub oo aad adigu la timaaddo
hal-abuur. In adigu laguu raadiyo shaqo waa arrin fiican, laakiin haddiiba
shaqadii laguu doonay laguu waayo, macnaheedu ma aha in wadda kasta kaa
soo xidhantay waxa la gaadhay wakhtigii aad soo banidhgi lahayd awooddaada iyo
aqoontii lagu baray. Waa fursaddii aad kaga shaqaysiin lahayd garashada kuna
noqon lahayd qof isagu iskii isu shaqaalaysiiya (self-employment).
Qofkasta oo wax
bartay ama jaamacad ka baxay waa uu ka bixi karaa shaqo la’aanta. Taasi waa
xaqiiqo marag ma doon ah. In aad shaqo la’aanta ka bixi kartana waxa aad ku
garawsanaysaa dhacdadan yar oo ah tusaale nool. Waa dhacdo aan si toos ah ula
kulmay waxbadanna ka bartay, qofkasta oo raba in halka uu taagan yahay ka
dhaqaaqana cashar ugu filan. Waxa ay kugu amraysaa in aad maskaxda dhaqaajiso,
awooddaadana si dhab ah u fiiriso.
Waa goor habeen ah, abbaaro 8:30-kii. Waxa aannu fadhinay
xatabadda hore, goob maqaaxi ah oo laga shaaho. Aniga iyo nin aannu asxaab
nahay ayaa shaah iyo sheeko isku dhex wadnay. Mashquul annaga ayaa iskugu
fillayn, waxa hareerahayaga ka socdana aad ulama aannu socon.”
Markaliya ayuu kursi agtayda yaallay jiidhay. Markii aan kor u
fiiriyayna waxa aan arkay nin khamiis iyo Muraayad madaw xidhan oo bokooradna
kolba waxa ka horreeya ku taabanaya si uu uga baydho. Markiiba waxa aan
yaqiinsaday in uu indha la' yahay waliba dam yahay. Lama aan yaaban waayo dad
badan oo indha la' horeba waan u soo arkay in badan, balse waxa ila cajiib
noqotay, markii aan dhacdo kale oo i soo jiidatay ku arkay. Waxa qoorta u
sudhan alaab badan oo aan markaa ka gartay suuman iyo alaabo kale. Waxa kale oo
uu sitaa bac wayn oo alaab kale ugu jirto. Waxa aan yaqiinsaday in uu yahay qof
ganacsade ah oo shaqaysanaya. Markii kursigii la dhaafiyay ayuu dadkii la dhex
istaagay si uu alaabta uu hayo ugu sheego dadka ciddii ka iibsanaysaana ka
iibsato. Sidaa ayuu kolba meherad ugu gudbayaa isaga oo ganacsade indha la' ah,
waliba ku qanacsan in uu shaqaysto isaga oo indha la' goor habeen ah.
Ninkaa laxaadka la waxa uu dhaqaajiyay awooddiisa
maskaxeed,waxaanu ku qancay in uu shaqysan karo cidkalena wax tari karo.
Waxaanu meesha ka saaray cudur daarka ah shaqo ma heli karo ama samaysan karo.
Ugu danbayn, mar
walba maanka ku hay in aad tahay fannaanka naftiisa. Waxa aad aamintaa in aad
tahay qofkii wax u soo bartay dadka iyo naftiisaba. Fursad kasta oo dahsoon
adiga ayaa lagaa rabaa in aad daaha ka fayddo. Markastana ogow in fikirka iyo
hal-abuurku ka qaalisan yahay lacagta. Iskaashi, dhiirranaan iyo wax isu gayn
ayaa dhallinta maantu kaga bixi karaan shaqo la’aanta ka jirta waddanka.
W/Q:- Maxamed M Jaaj.
No comments:
Post a Comment