"Cilmi-nafsiga iyo isirka wahsiga ku dhisan sug, sug, sug"
Sida qoreyaasha badankooda
waxa aan ahay caadayste wahsi badan.
Markii aan ku guda jiray qorista maqaalkan waxa aan hubiyay sanduuqayga farriimaha ku dhawaad saddex kun
oo jeer, waxa aan sameeyay oo haddana
tuuray liisas badan oo raashin ah, waxa
aan galay dagaal wakhti dheer oo dhinaca Tuwiterka ah oo ku saabsan in hannaanka
dahabku yahay kan ugu xun siyaasadda
dhaqaalaha ee abid la soo jeediyo. Waxa aan barta Faysbuugga farriimo u ga
diray kuwii aannu isku fasalka ahayn ee aanan arag dhuwaad tobanaan sano. Waxa aan abuuray qaacido cusub
oo lagu macaanaynayo samaynta Jokolaatka khudaarta ah, sida oo kale waxa aan
marar badan magacayga ka raadiyay googlaha si aan u ogaado in qofuun raadiyay
qormooyin aan qoray si uu u akhriyo.
Hawlo aan jihaysanayn baan hayay.
Dabcan
dad badan baa wahsada, laakiin tani qoreyasha waxa ay ku tahay khatar guud
xirfadooda. Tifaftire buug ayaan kala
hadly oo aan xasuusiyay in uu ii sheego buuggii ugu horreeyay ee loo
xilsaaray in uu ka shaqeeyo ama
tifaftiro sanadihii 1990-dii. Balse waxa uu qandaraaskaas ku jiray laga soo
bilaabo sanadkii 1972-kii.!
Markale waxa aan wayddiiyay
mid ka mid ah asxaabtayda caqliga badan, oo aad na caan u ah sida ay ugu suurto
gashay in uu si joogto ah u soo saaro qormo ka kooban sideed kun oo kelmadeed
oo heersare ah. Waxa uu yidhi “si
fiican. Ugu horeyn waxa aan dib u dhigaa laba illaa saddex todobaad. Ka dibna
waxa aan u fadhiistaa si aan u qoro. Waa marka aan tooso, ee aan nadiifiyo
geerashka. Intaa ka dib wax aan fuulaa jaranjarta, haddana waan ka soo degaa,
misana u cawdaa xaaskayga saacado dhawr ah. Sidaa waxa ku taga maalmo badan. Runtii waxa aan ka
cadhoodaa in aanan ku dhamayn wakhtigii ay hawshu ku dhamaanaysay. Ugu danbayntii waan fadhiistaa ka dib na
qoraa.”
Sannado badan waxa aan curinayay
aragti ku saabsan: sababta qoreyaashu u noqdeen kuwo sidan u wahsada. Wali ba
innaga oo aad u gu fiican fasalada luuqadda Ingiriisida. Tani waxa ay u muuqataa waalli, laakiin
maqalkayga kicisay.
Qoreyaasha intooda badani
waa kuwa si fudud u gaadha darajada ‘A’ marka la gu jiro fasallada Ingiriisida
ama luuqadahaba. Xilliga carruunimada marka macallinka naxwuhu ku dedaalayo in uu
inna baro casharro ujeedkeedka dedaalkoodu ahaa furaha ugu mudan ee guusha
waxbarashada iskuulka, se qoreyaasha mustaqbalku waxa ay si cad u beeniyaan
arrintan. Halka kuwa kale ay si cagajiid
ah wax u akhriyaan, sidaana waxa ay ku qaataan akhrinta buug-gacmeedka laba
fasal. Kuwani waa carruurta soo jeedisa sheeko fanneed dhammaystiran
mashruucyada fasalka shanaad. Taa macnaheedu ma aha in aanay waligood dhicin,
balse xilliga carruurnimadoodaba aad uma guuldaraystaan awooddooda maskaxeed ee dabiiciga ah ayaa ku
ilaalisa in ay noqdaan kuwa hoggaamiya fasalladooda.
Ku-dirqiyidda hawluhu inta badan innama diyaariyaan, se waxa aynnu badanaa ka la kulanna is hagrasho ama
isxakamayn awood-jidheed, waa falid waxyaabo innagu riixa fashil. Tani waxa ay
inna baraysaa cashar been ah, oo aan wanaagsanayn, taas oo ah in guusha shaqadu
ku xidhantahay garashada u dhalashada [dabiiciga] ah. Nasiib darro se, marka
aad tahay qoraa xirfad yaqaan ah waxa aad la tartamaysaa dhammaan carruurta
kale ee ugu sarraysa fasalka luuqadda
Ingiriisida ama luuqadahaba. Laga yaabee
in aan xirfadaadu noqon ta ugu fiican.
Haddii aad noloshaadaba ku
soo qaadatay geediga wajahidda awoodda dabiiciga ah, qabashada hawlaha fudud
ee dhakhsaha badan, kelmed kasta oo aad
qortaa waxa ay noqonaysaa tijaabo sheegaysa
awooddaada, maqaal kasta oo aad samaysaana waa afti ka hadlaysa sida aad u
qoraa wanaagsan tahay. Walina waxa ku hortaalla fursad aad wax kaga qorto
arrimo badan sida sheeko faneed, taariikh iyo kuwa kale.
Cabsida isku day la’aanta.
Qoreyaasha intooda badani
waxa ay isku dayaan in ay maareeyaan hawlahooda qoraal markasta oo wakhti-dhammaadka
hawshu soo dhawaado, cabsidooda ah in aanay waxba isku dayayn ayaa ka badata,
cabsida ay ka qabaan in ay si khaldan wax u falaan [qoraan]. Waxa aan daawaday
oo la yaab I gu noqotay tiro badan oo suxufiyiinta da’ yar ah oo kharribay mihnaddooda qoraal iyaga ku
guuldaraystay in ay maqaallo sameeyaan. Kuwani waa dad ka qalinqortay
waxbarashada sare Kooljyada, kuwaasi oo qori kara jumlado ama qoraallo
dhamaystiran, laakiin ujeedadu ma aha in ay yihiin kuwo caajis ah oo aan
khibrad lahayn. Laakiin waxa xakamaysay aragtidooda ah in ay qorayaan qormo aan
wanaagsanayn.
“Sax” ayaa ay iigu
jawaabtay Carol Dweck oo ah macallimad cilmi-nafsiga ka dhigta jaamacadda
Stanford markii aan u jeediyay aragtidan.
Waa mid ka mid ah khabiirada ugu caansan aqoonta cilmi-nafsiga dhiirigalinta. Dweck waxa ay mihnaddeeda wakhti badan
galisay barashada guuldarada iyo sida ay dadku u la macaamilaan marka fashil
soo gaadho. Sida la ga yaabo in aad
filayso guuldaradu ma aha dhammaan hawlaha la yaqaan oo dhan. Hasa yeeshee sida
ay ku caddaysay cilmi-baadhisteeda waxa ay xustay in aan qof waliba la falgalin
oo aan fashilku dadka wada xanuunjin.
Dadkii ay xogta ka qaadday intooda badani waxa ay ka xumaayeen hawlihii
aanay sida wanaagsan u qabanin wakhtigii tegay, halka kuwa kale na ay horumarka ku kasbadeen tartanka iyo is xujaynta. Waxa ay si togan u gu raaxaystaan waxyaabihii
aanay ku wanaagsan, iyada oo sababta
runta ah ee ay fashilkaas u sababaynayaana tahay in ay cashar ka baranayeen ee
aanay fashilmin oo kali ah.
Dweck waxa xal-xidhaale ku
noqday waxa marka hore ba dadka ka dhigay kuwa ka duwan kuwa dhiggooda ah, ama
la siman xirfad ahaan. Maalin iyada oo
fadhida xafiiska, oo falanqaynaysa natiijada tijaabo uu sameeyay mid ka mid ah
ardaydeeda qalinjabinaysa waxa ay u soo baxay: in dadka inta badan neceb
tartanka ama is xujaynta ay u maleeyaan in kartida caqligu tahay shay xadidan
(shay aan la kordhin karin oo meel taagan), laakiin dadka ku raaxaysta tayada
garashada waxa ay rumaysan yihiin in
awoodda garashadu tahay mid la
kordhin karo iyada oo la qabanayo waxyaabo aanu qofku ku fiicnayn qabashadooda
ama aqoontoodaba.
“Waxa ay ahayd arrin iga yaabisay” ayay tidhi Dweck. Waxa ay ku kala saartay in kooxda hore leedahay
maskaxd go’an (Fixed mind-set), isla markaana aamisan in aanay korin karin
maskaxdooda, halka kooxda danbe tahay kuwa u saaxiib ah garasho/maskax koraysa
(growth mind-set) isla markaana kuwani yihiin kuwa jecel waxkorodhsiga joogtada
ah iyo kordhinta garashadooda. Labada qolo ka aad doonto ahow, heerka aad
doontana ka ahow, balse waxa ay kaa caawinaysaa in aad ogaato sida aad ula
falgalayso shay kasta oo garashadaada tijaabinaya. Bal u fiirso; dadka maskaxda furan ee
garashadoodu korto (kooxda danbe) xujooyinka iyo tartammadu waxa ay uga dhigan
yihiin fursad ay ku sii fogayn karaan kartidooda caqliga laakiin kuwa maankooda
meel taagan yahay (kooxda hore) waxa ay fursaddu uga dhigantahay halbeeg ay
ku cabiraan heerka fogaan-adaygga
garashadooda iyo sida aan caqligoodu fursaddan wax uga korodhsan karayn. In aad aaminto sida aad u gu fikirayso in
aanad ugu wanaagssanayn hawl qabashadeedu ma aha fursad ku siin karta
horusocod, laakiin waa calaamad ama farriin muujinaysa in aad u baahantahay
shaqo ka xirfad hoosaysa ama ka xirfad fudud sida dhul xaadhis oo kale.
Cabsida aad ka qabto in lagugu
fahmo kartidaradaadu waa shay ku badan bulshada, taasina waxa ay
leedahay magac caafimaad ah midabaynta faraha badan --poster Syndrome [xanuun
been-abuurasho qofeed ama iska yeelyeel kartiyeed si aan dadku kuu fahmin].
Tiro yaab leh oo dadka guulaysta ah gaar ahaan dumarku waxa ay aaminsanyihiin
in aanay gaadhin booskoodii waxa aanay khatar ugu jiraan in ay noqdaan dad is
bedbedala oo aan qaab loogu soo hagaago lahayn, isla markaana ammin kasta
wajiyo kala duwan laga filan karo marka hawli timaaddo maaddaama oo ay ka cabsi
qabaan kartidooda maskaxeed iyo jidheed ba. Dad badani waxa ay si ula kac u
raadiyaan shaqooyin ay ka soo dhalaali karaan, taas oo dadka oo dhami ku ammaani karaan halkii ay si
adag u waji lahaayeen hawlaha horyaalla ee aan fududayn ama u baahan kartida
caqliga iyo tan jidhkaba.
Dadkan haddii la gu xujeeyo
in ay halgamaan waxa ay dareemaan in
aanay u gu diyaarsanayn si nafsi ah iyo si maskaxeed ba hawshaas qabashadeeda.
Waxa ay nafahooda ku sameeyeen waxa Cilmi-nafsigu u yaqaan “Is-xakamayn
shakhisiyadeed” [Self handicapping]: taas oo macnaheedu yahay falidda waxyaabo
qalin-daaraya waxqabadkooda si ay u cudurdaar u gu helaan hawlqabad xumadooda
ama in aanay si fiican wax u falin. Is-xakamaynta shakhsiga ahi waxa ay noqon
kartaa mid ilaa heer aad u cajiib ah. Aqoon baadhis la sameeyay ayaa la gu
sheegay in mararka qaar raggu ay qaataan daroogooyin ka hortegaya ama joojinaya
habsami-u-fallidda hawlaha marka ay qabanayaan shaqooyin aanay ku kalsoonayn in
ka soo bixi karaan. Cilmi-nafsiyaqaan Edward Hirt ayaa qormo uu u bixiyay
“halkii ay waxbaranlahaayeen” ku yidhi “habeenka imtixaanka ka horeeya ardaydu
waxa ay daawadaan Filim. Haddii uu waxba
ka shaqan waayo waxa uu fashilkiisa ugu cudurdaarayaa in aanu waxba akhriyin
ama dhiganba, halkii uu u aanayn lahaa awood darradiisa ama kasma-xumadiisa.
Dhinaca kale, haddii uu imtixaanka si fiican u ga shaqeeyo, waxa uu ku tookhayaa
in uu awood maskaxeed dheeraad ah leeyahay, maxa yeelay waxa uu imtixaanka ku
guulaysan karaa isaga oo aan waxba dhigan/akhrisan”
Haddaba, qoreyaasha aan soo
saarin nuqul qormo ah ama wakhti dheerba ku qaadato iyaga oo aaminsan in aanay
qormo wanaagsan soo saarayn waa kuwa si iskood ah isu siiya marmarsiiyaha ugu
macquulsan ee ah in aanay ku guulaysanayn qormadaas.
Alain Boton waxa uu yidhi
“hawshu waxa ay bilaabantaa marka cabsida aad ka qabto in aanad waxba qaban
karin ka badato cabsidaada ah in aad six un wax u fasho.” Dadka illaa xad
maskaxdoodu xadidantahay [meeltaagantahay], marnaba is bedelka ama xadhka
goosiga garashadu agtooda macquul kama aha. Waxba kama baqayaan maaddaama oo ay
ogyihiin in aanay waligeed suurogal
ahayn in maankoodu isbedel samayn karo wakhtiga ay doonto ha qaadatee.
“ubadka aad ugu dheereeya akhrisku iyada oo
aan si wacan loo hagin ama la kormeerin waxa ay ku mutaan ammaan ” ayay tidhi
Dweck. “Maxay se baranayaan? Waxa ay
baranayaan in aan caqli badnaantu ka
iman in la ga takhaluso xujooyinka, oo si adag loo shaqeeyo. Waxa ay u arkaan in si fudud loo wax loo qabto. Marka ay is qoraan koolajyada ama dugsiyada
laga qalin-qorto, hawlaha adagna bilaabmaan
ma garanayaan si ay u wajahaan.”
Ku-mitididda
Hawlkarnimada.
Qaab-yaalkeenna
waxbarasho waa mid loo dejiyay in uu xanaaneeyo ama caawiyo dadka maskaxda
xaddidan oo kaliya. Bal ka fikir mid ka
mid ah fasaladii Ingiriisida ee caadiga ahaa.
Waxa aad akhriysaa shaqo wayn oo qoraa hore qabtay, ka dibna waxa la ga doodayaa farriimaha
qoraalkiisa iyo waxa ay ku saabsanaayeen,
hab-luuqadeedka uu adeegsaday, dhismaha buugga/qoraalka iyo sawirka uu
ku soo gudbiyay. Si gaar ah waxa aad u xasuusataa xikmadihii mucda ahaa si aad xillig
imtixaanka u soo maan-faqdid adiga oo aan shiilin ama wakhti kale ba u soo
xasuusatid. Badanaa ardayda aad looguma
dhiirigaliyo in ay dhugtaan qabyo-qoraalka shaqooyinkooda hore. Waxa kali ah ee indhahoodu arkayaan waa
maxsuulka sida gacaltooyada leh u subkeen qorayaasha iyo tifaftireyaashu illaa
xad. Marka baruhu wayddiiyo “halkaa qoruhu muxuu uga jeeday”? ma jiro qof
sheegi kara in jawaabtu noqon karto “mid aanu garanayn” ama “in jumbladani ka mid ahayd qayb muhiim
ah oo ka tirsan qabyo-qoraalka hore oo uu ilaaway in uu dib u muraajiceeyo.”
Ama u fiirso baadhistii
fasalada sayniska ah la samayn jiray. Waxa ay ka koobnaayeen aragtiyo gebi
ahaanba u muuqday in ay sax yihiin waagaa, ma aha dadka aaminsan in
khuraafaadka falaadhaha-N ay caddeeyeen in bini aadamku leeyahay 48 hidda-side
[Chromosome] ama aragtiba ku rumaystay gacamada khiyaaliga ah ee meeraha Mars
la innooga soo tebiyay. Marka aynu
akhrino aragtiyihii been-abuurka sayniska ahaa ee Lamarckian---taasi oo
sheegaysa [marka nooluhu wax ka bedelo qaabnololeedkiisa si uu ula qabsado
deegaanka, in isbedelkaas uu sameeyay u gudbinayo awlaaddiisa qaab dhaxaltooyo
ah. waxa uu rumaysnaa in nooluhu isbedelka hiddaha u sameeyo doonis iyo baahi.
Feneroloji –barashada aragti cilmi-nafsadeed tibaaxaysa in astaamaha iyo
awoodaha garasho ee maskaxda ay qaabeeyaan samayska qalfoof-madaxeedka qofka--
iyo taranka ay samaynayaan facyawga isbedelayaa.
Haddaba
dadka rumaystay aragtiyahan waxa ay si joogto
ah u ga soo gudbeen sidii nacnac qof jaahil ahi yiidhi oo kale, inkasta
oo badankoodu ay kala shaandheeyeen saynis yahanka sida dhabta ah wax ugu
biiriyay kuliyadahooda iyo ka kale, haddana waa ay ka koreen aragtiyahan.
Dweck waxa ay tiddhi
“waligaa arki maysid khaladaadka ama halgankaba” wax la la yaabana ma aha in ardaydu aragti ahaan u aaminaan in
ahaanshaha qoraa wanaagsan macnaheedu yahay in aanad marnaba qorin wax liita ee
ay ka madax bannaantahay, Taas oo macnaheedu yahay qoraaga heerka sare ahi waa
ka mar walba qormo heersare ah soo saara.
Nasiib darro se waxa
aad marwalba shaqadaada qoraalka ku wajahaysaa cutubyo adag, jaantus-muujineed lagu dedaalayo sawiriddiisa
iyo sheekooyin aan dhammaad lahayn oo diidaya in aad ujeedada qoraalka
gaadho. Pastor Furtich waxa uu yidhi
“sababta kali ah ee aynnu u la halgamaynno nabadgalyo darrada, waxa aynu
barbardhignay muuqaalkeenna daaha-dabadiisa ah [colaadda ka dib] iyo kan la ga dheehan karo qof walba marka
nabaddu jirto, taas oo ah farqiga u dhexeeya labada xaaladood.” Waxa la mid ah
in aad sii sawirto dhadhanka qoraalkaaga timaadada.
Dhalinyaradu kuma
qanacsana adduunkan aan shaqooyinkiisu qaabsanayn. La yaabna malaha in arday
badan oo xarfaan ahi ka shaqeeyaan warshado leh xuduudo shaqo oo lagu maamulo
waajibaadada shaqada sida maaliyadda iyo la-talinta.
Muddo laga joogo lix sano,
mufasiriintu [khubarada arrimaha bulshada faalleeya] waxa ay ogaadeen
hab-dhaqameed ku lammaan jiilka danbe ee
casrigan ka soo qalin-qoratay jaamacadaha. Ugu danbaynna qoraaga la yidhaa Ron
Alsop waxa uu u bixiyay ‘ubadkii
guulaha’ [ubad qurxoon oo guushoodu muunad u tahay waalidka]. Facan waxa la baray in ay
aaminaan in aanay jirin guuleystaal iyo guuldaraystaaltoona ama kala mudnaaniba,
waxa ay helayaan abaalmarin haba ahaadaan kuwa aan lahayn hibo-xirfadeed iyo
habsami u shaqayn wanaagsane. Waa dad la koolkoolinayo oo mar walba la
muunaynayo.
Marka ubadkani shaqo galaan, maaareeyayaashooda
shaqo waxa ay kaga soo cawdaan in qalinjabiyaashan cusubi filnayeen in goobta
shaqadu u la mid noqoto ardaagii waxbarashada [iskuulka] ee sida fiican u
qaabaysanaa, deganaanta iyo raaxada badnaa. Taas oo gundhaceedu yahay in ay rajaynayeen
in hawlaha shaqadu u habaysan yihiin sidii hawlaha waxbarashada dugsigu isugu
dubbadhacsanaayeen, iyaga oo aan haabka ku darin in shaqadu ka duwantahay oo ay kaaga baahantahay in aad adigu
nidaamiso, qorshayso, dhaqaajiso oo isku dubbariddo. Waxa ay kaaga baahanyihiin in aad dulsaarto
hawlo adag oo si wanaagsan loo qeexay
iyo warcelin joogto ah, sidii iyaga oo wali isku dayaya in ay ogaadaan waxa
imtixaanka ku iman doona [baqe-galin shaqo].
Way kugu adkaanaysaa in aad ku celiso warbixin taban oo qeexaysa hoosaynta heerkooda shaqo, haddii aanad burburin
islawaynidooda. Waxa ay u fikir-soconayaan sidii ay garanayaan wax ka badan
inta garanayaan”, qof loo-shaqeeye ah ayaa sidan u sheegay Bruce Tulgan:
qoraaga buugga Qof waliba ma hanto billad—Not Everyone Gets Trophy.
Waan ka yar shakisnaa markii aan
bilaabayay in aan arrinta dadka wax ka wayddiiyo. Isku soo wada duuboo, qarniyo
badan ayaa waaya-araggeenna ama dadkeenna waawayni ka murugaysanyihiin
da’yartan waayo-aragnimo la’aanta ah. balse markasta oo aan mawduucan badka
keenaba waxa aan la kulmayay duufaanno cabashooyin oo igaga imanayay dadyaw
maamulayay shaqaalaysiinta iyo la macaamilka jiilka danbe tobannaan sano. Taas
oo daaran in marwalba kala duwan yihiin xaaladaha shaqo iyo marka qofku deegaanka kobcinta garaadk iyo
qalwada aqoonta ku jiro. Maareeyaashani
waxa ay awoodayeen in ay is barbardhigaan fasaladii hore ee da’yartan iyo
hadda, iyaga oo aan ka cabir qaadanayn
sawir maskaxeedka inagu kaydsan ee innoo sheegaya sida aynnu dhammaanteen u
tayo-fiicnayn markii aynnu gedahooda ahayn.
Waxa aanay ku adkaysanayaan in si dhab ah wax isu bedeleen-- isbedelkaas oo aan ku xadidnayn carruurta la
koolkooliyo ee la buunbuuniyo horyaalnimadooda.
Todd: maamulaha Midwest oo ah goob
baabuurta lagu kireeyo waxa uu yidhi “waxa aan shaqaalaysiin doonaa qof
wanaagsan oo da’diisu tahay 27 jir. Haddii
aan shaqaalaysiiyo qof u dhexeeya 23 ilaa 24 sano jir, waxa uu iga doonayaa in aan
wax kasta u sharraxo, oo mar walba dultaagnaado si aan shaqada u gu tilmaamo.
Waxa ay ka dhigantahay sidii adiga oo muddo afar sano ah taabanayay daaraa-damiyaha laydhka [switch].”
Facani waa dad xoog-finiin ah, kana taxaddir badan facayga, balse waxa
badankooda ka muuqata in aanay la dhacsanayn marka loo eego adduunkan aan
shaqadiisu qaabaysanayn iyo goobaha ay
wax ku soo barteen ee sida qurxoon loo habeeyay. Ma aha wax la la yaabo in arday badan oo
hormood ahayd ayaa ku shaqeeyaan maamulka
maaliyadda iyo la-talinta--waa shaqooyin ay ku urursan yihiin haldooro kale oo jaamacado
ka soo qalin-qortay, taas oo dib-u-eegis nidaamsan iyo horumar joogto ah lagu sameeyo.
Qalinjabiyeyaasha maanta waa ay ka
aqoonsi/shahaadooyin wanaagsanyihiin marka la barbar dhigo facii ka horreeyay,
waanay ka hawl-karsan yihiin laakiin shaqo wanaaggoodu kaliya waxa uu soo
baxayaa marka jihayn iyo hagid cad la siiyo.
Waa dad ammaanta iyo muunaynta joogtada ah baahi badan u qaba. Ma la yaabbaa in kuwa badan oo qaangaadh ah la
gu garabtaaganyahay dhankasta oo noloshooda ah? waalidiinta heerkooda dhaqaale
fiicanyahay waxa ay ubadkooda siiyaan diyaarin tayaysan yaraantooda si loogu sii diyaariyo higgaamin
ama ba looga dhigaba Dalai Lamas yar
[hoggaamiyaha ruuxiga ee diinta Buudhism-ka].
Dhammaan gargaarradani waa
kuwo halis firfircoon ku leh facan
danbe. Maalmahan waxa la ii sheegay in dugsiyada gaarka loo leeyahay ee Newyork
si degan oo farsamaysan ula tacaalayaan faafidda mushkilado yar oo
macalimiinta qaaliga ah ka imanaysa, kuwaas oo iyagu u ga shaqanaya ubadka
shaqo-gurigoodii, taasi oo ah waxa aan xataa laga fikiri karin markii aan
dhanka waxbarashada ku jiray labaataan sano ka hor. Waalidiinta waxa ay ku xidhanyihiin
bareyaasha, ubadka se maya, laakiin dhawaanahan waxa ay u muuqataa in
arrintaasi is bedeshay. Ayuu yidhi Todd.
Tobanaan sanoba waxa jirtay
fursad in laga mahadceliyo mudan, taas oo ah korodhka iyo balaadhnaanta deegaanka waxbarasho, walina
waxa jira ardaa waxbarasho oo uu helayo arday kasta oo doonaya in uu koolajyada
iska diwaangaliyo. Laakiin war baa jira. Badi goobaha waxbarasho ee cusub waxa
laga sameeyay dugsiyo aan si aad ah loo soo xulin. Maraykanka saddexdii meelood, laba ka mid ahi waxa ay
iska diwaangaliyaan koolajyo ujeeddadoodu tahay in ay aqbalaan qofkasta oo soo
codsada. Dugsiyada ugu wanaagsani waxa
ay aayar aayar ah ugu kordhiyaan koboca dadwaynnaha tayada leh boqolkiiba
toban. Baahida loo qabo in la
buuxiyo goobahan aad bay u korodhay,
maxa yeelay dhaqaaluhu marwalba waxa uu galayaa tartan hore leh, waalidkuna waxa ay naawilayaan in loo
damaanad qaado guusha ubadkooda. Iskuul tayadiisu wanaagsantahayna waa waxa ay
marwalba si dhaw uga fikiri karaan.
Ugu danbayn
waxa aynnu waalidkeen ka helaynaa rabbayn dhug leh: waxa ay samaynayaan kormeerid joogto si ay u hubiyaan in ubadkoodu
joojiyeen fanashada sallaanka guusha ee ka bilaabmaya galidda koolajyada tayada
leh, si ay timaadada u gaadhaan nolol wanaagsan. Guud ahaan waa falcelin togan
oo ku aaddan nidaamkeenna waxbarasho, kuna taageeraya in uu hore u socdo, surmoseegto
kaliya oo aynnu samaynaana waxa ay inaga reebaysaa tartanka. Laakiin tani ma
tahay carbin wanaagsan? Shahaadooyin dahab
ahi inooma damaanad qaadayaan guusha, sidaas si la mid ah haggidda suubban ee
waalidku ku ilaaliyo ubadkiisa ma damaanad qaadayso guusha, kaliya waalidku
waxa ay hor istaagayaan waxa loo baahan yahay oo ah ubad aqoon ahaan dhisan iyaga oo marar badan dariiq adag u maraya. Sidaas oo
kale waxa ay halmaansiinyihiin in ay khaladaadkooda casharro ka baranayaan, marka
laga reeyo isla markaana dib boodhka isaga tumaan oo halkii halganka ka sii
wadaan, ama u guuldaraystaan si sharaf leh [ guuldarro ka soo gaadhay isku
daygooda oo waaya aragnimo iyo horusocod u kordhisa]. Tani waa midhka [waaya aragnimada] ugu
muhiimsan ee ubadkeennu ka baranayaan dugsiyada, laga yaabaa in kuwa kale taa
bedelkeeda yihiin. Sidaa si la mid ah qalinku iyo waxqorista waxa ay u
baahantahay isku day joogto ah iyada oo khaladadaadka qormo kasta laga dheefayo
horu socod iyo casharro taageeraya fiiqnaanta qalinka.
FG: Qormadan waxa aan u soo
guuriyay eray ahan iyo nuxur ahaan
labadaba.
Qalinkii: Megan Mcardle.
W/T: Maxamed M Jaaj.
No comments:
Post a Comment