Qodobbo muhiim u ah
curinta qormooyinka gaagaaban.
Curinta qoraalka iyo
sida uu u kala cuddoon yahay ba waxa ay la xidhiidhaa hibo qofku gaar u
leeyahay ama dedaal dheeri ah oo uu galiyay in uu barto Af-qoraalka. Labadaa
masalo ayaa saldhig u ah in qoruhu soo bandhigo faaallo-qoraaleed soo jiidasho
leh. Qore kastaa waxa uu awoodda saaraa sidii uu qalinkiisa ugu dhisi lahaa
Bariij isku xidha isaga iyo akhristihiisa. Si uu yoolkaa u gaadho waxa uu
degaal galiyaa sidii uu dhisi lahaa qoraal
si dhammaystiran u sawiraya arrinta
uu markaa wax ka qorayo. Isla jeerkaasna
akhristuhu ku qanco farshaxannimadeeda, waxa ay uga waramayana si fiican u fahmi kara.
Qoraagu waa akhriste wax qoraya. Marka uu ka faraxasho
qoraalkiisa waxa uu u tafa-xaytaa sidii u dhadhamin lahaa erayada uu qalinkiisa
ku fadhiisiyay. Markan waxa uu taagan yahay geesta akhristaha nooca dhadhanka
uga soo baxaana waxa uu noqonayaa kii akhristuhu ka dhadhansan lahaa qormadaa
iyada ah. Dib u akhrin iyo saxar-tirid kaddib, haddii uu si fiican ugu qanco waxa
u soo baxaysa in uu curiyay qormadii ay ahayd in uu la wadaago akhristaha. Dhawrkan
qodob ee hoose waxa ay qayb ka ciyaaraan sida loo curiyo qoraal cuddoon, si loo
kasbado maanka akhristaha.
1.Si aanu kaaga baahin
qalinku, qoraalkaaguna u noqon mid aan jiho lahayn; baro macmiilaaga qalinka (Cidda
qoraalkaagu la hadlayo). Marka aad ogaato akhristaha kuu calaamadsan ayay kuu
fududaanaysaa in aad ku koobnaato mawduuca, akhristahana u xoqdo meelaha cuncunaya. Tusaale ahaan; haddii
aad rabto in aad qalinka kula hadasho macaamiil ku xidhan dukaankaaga waxa
mudan in aad ku koobnaato macmiilka iyo xidhiidhka ka dhexeeya dukaankaaga. Haba ugu mudnaato sidii ay u aamini lahaayeen alaabta aad gaddo
una noqon lahaayeen qaar wakhti danbe ku sii xidhnaada meheraddaada.
2.Mawduuca aad ka
waramaysaa in xiiso leeyahay iyo in aanu lahayn waxa ka mudan in hab
qoraalkaagu waafaqsan qaacidooyinka naxweed ee la isla waafaqsan yahay, isla
jeerkaasna la jaanqaadayo maskaxda akhristaha kuna khasbi karo in uu ku negaado
sii akhriskiisa. Marar badan oo kalena uu u muraaqoon karo in uu dib akhriyo.
3.Qoraallada gaagaaban
sida maqaallada, curisyada sheekooyinka gaagaaban, wararka iyo warbixinnada laga curiyo arrimaha markaa
taagan iyo fikradaha shakhsiga ah ee lagu bandhigo fagaareyaasha qoraal-hadalka (qofku ku cabbiro
aragtidiisa qofeed ee ku wajahan arrin), dhammaantood waxa ay u baahan yihiin in
qoraagu si miisaan leh uga baaraandego qoristooda iyo waafajinta heersanka
qoraalka ee la isla ogyahay.
4.Faallo-qoraaleedkaagu
waa in uu noqdaa mid ka turjumaya aragtidaada ku aaddan shay (fikirka aad ka
qabto dhacdo,shay ama qof). Marka aad qoraal ka samaynayso arrin dhacday,
taagan ama iman doonta waa in qoraalkaagu u taagan yahay fikirkaaga shakhsiga
ah. Haddii aad kaga faallooto waxa dadka kale ka aaminsan yihiin
arrintaa/shaygaas waxa meesha ka baxaya duxdii qoraalkaaga, waayo maad soo
gudbin wixii garashadaada kaga aaddanaa falkaas. Haddii sidaas qoraagu sameeyo
waxa uu noqonayaa soo tebiye dhacdo ama wariye. Dhib malaha sida arrintaas
khatar u leedahay ama xiiso u leedahay.
Laakiin muhiimaddu waa in aad soo tebiso ogaalkaaga gudeed ee kaaga beegan
dhacdadaas; mid togan iyo mid taban ka uu doono ha noqdo’e. Hadda ma aha ha soo
xiganin aragtiyaha caalimaga ah ama qaacidooyinka la isla qaatay ee hore loo jaangooyay.
Laakiin marka ay noqoto ogaal-hadalkaaga
waa in uu noqdaa mid adiga kuu gaar ah.
5.Qaab dhismeedka
caalamiga ah ee qoraal kooban, maqaal, curis ama war loo tebiyaa waa in la
raaco qaabka saddexan ee la isla ogyahay kaasi oo ka kooban hordhac, muc iyo
daba-dhac ama gunaanad. Qalfoofkani waxa uu kuu sahlayaa in aad samayso qoraal
kala soocan. Waxa kale oo uu kuu sahlayaa dareerinta qoraalka aad doonayso in
aad ka curiso dhacdo tagtay,taagan ama imandoonta. Waajibka koowaad ee ku
saaran jeerka aad wax qorayso waa in qoraalkaagu ku fadhiyo qaab dhismeed kala
hormaysan, haddii aanu ahayn qoraal iska caadi ah ama aanad ugu tala galin in
aad u bandhigto hal qof wax ka badan.
6.Mawduuca aad wax ka
qoraysaa waa in aanu adiga kugu cusbayn ama aanad waxba ka aqoon. Haddii aanad
macluumaad dheeraad ah ka hayn ama uu kugu cusub yahay shayga aad ka
faalloonaysaa, ha u soo gubin akhristahaaga. Aqoonta, shayga iyo dhacdada aad
qoraalka ka curinaysaa waa in aad ugu yaraan wax ka taqaan ama aanay kugu
cusbayn. Haddii aanu ahayn qoraal aad ku
raadinayso xog kaa maqan. Si aad akhrista u tusto wax ka maqan oo aanu ogayn
ama se aad u gu sii iftimiiso aqoon uu hore u ogaa waa in aad adigu aqoon kugu
filan ku haysataa mawduucaas aad qalinka u qaadatay.
7.Luuqada aad ku
tebinayso qoraalku waa in aanay noqon mid dadka gaara hi uun fahmi karaan. Haddii
taasi dhacdo waxa aad la hadlaysaa dad gaar, ujeedadaaduna ma dhaafsana intaa
aad la hadlayso. Si haddaba aad u wada
gaadho bulshada aad la hadlayso adeegso
luuqad fudud oo la wada fahmi karo. Waa suuro gal in mararka qaar qoraalkaagu
khuseeyo cid gaar ah ama koox gaar ah. Tusaale ahaan; waxa aad gorfeyn ku
samaynaysaa suugaanta soomaalida. Jeerkan waxa aad u baahantahay in qoraalkaagu
noqdo mid lagu nashqadeeyo luuqad suugaaneed iyo erayo dhaqan si aad u taabato
dareenka dadka suugaan yahan ka ah. Balse mawduucyada bulshada intooda badani
waxa ay u baahan yihiin luuqad fudud oo la wada dheehan karo.
8. Faallo-qoraaleedka
aad samaynaysaa waa in uu noqdaa mid dhacdadaa sawir buuxa ka siin kara
akhristaha dhacdo aanu goob joog ka ahayn. Markasta qoraagu waxa uu jecell
yahay in uu hanto maskaxda akhiristaha, si haddaba uu u gaadho ujeedada aadka u
culus, waa in uu qoraalkiisa ku muujiyaa sida ugu macquulsan ee akhristahiisu
wax u fahmi karo, isaga oo ka duulaya luuqadda iyo qaababka ay suuro gal tahay
in uu u fahmo arrinta uu ka hadlayo. Tusaale ahaan; marka aad doonayso in aad
akhristahaaga u sheegto horumarka dhaqan dhaqaale iyo siyaabah kor loogu qaadi
karo. Waa in qoraagu uu sameeyo hordhac iyo faahfaahin ku saabsan dhaqaalaha
iyo dhaqank, sida oo kale waa in uu soo xigtaa tusaalayaal maxalli ah oo qofka
akhristaha ahi soo arkay ama uu ka fikir karo.
9.Iska ilaali inaad
xaddo maskaxda akhrista, oo aad uga faalloota waxyaabo aan ka mid ahayn ama aan
sinaba ula xidhiidhin mawduuca aad ka hadlayso. Kana digtoonow in aad
faalladadaada ka buuxiso waxyaabo maanka ka baxsan oo aan macquul ahayn. Halkan
waxa ka baxsan qoraallada khiyaalka ah ee lagu sameeyo hummaag aan dhicin balse
ay macquul tahay in ay dhaceen am dhaci karaan sida sheeko khiyaalka ah oo
kale.
FG: Qormadani waxa ay
la xidhiidhaa qoraallada kookooban. Waxa ka madax bannaan qoraallada lagu
raadiyo xogta sida xog ururinta iyo qoraal kasta oo si uun uga duwan hab-qoraalka aynnu faallaynay.
Qalinkii:- Maxamed M.
Jaaj
jaaj993@gmail.com
No comments:
Post a Comment